سوشیال میدیا و خوە کوشتن بوویە دیاردەیەکا بەربەلاڤ و چاڤلێکرن
رێژەیا خوە کوشتنێ د ڤان هەیڤێن دویماهیێ دا بەرەڤ زێدە
بوونێ ڤە چوویە تایبەت د ناڤ گەنجێن ئاوارە دا ل کەمپان دا، سەختیا ژیانێ و
هەبوونا ئاریشێن دەروونی ژ فاکتەرێن بەرچاڤن د زێدەبوونا ڤێ دیاردێ. بو زانینا
رێژە و هژمار و ئەگەر و ئاستێ تەمەنێن وان گەنجێن خوە دکوژن مە چەندین پرسیار ژ
پسپورێن جودا جودا کرن :
ادیبە سیتو جتو بەرپرسا ئەنجومەنێ شنگال یێ ئێکەتیا
ئافرەتێن کوردستانێ :
دەربارەی چەند
پرسیارێن مە ب ڤی شێوەیی ئاخفت ، چ ئامارێن دروست و تێر و تەسەل ل بەردەست نینن دا
کو ئەم ب تەمامی هژمارا خوە کوشتنێ بزانین و ئەگەرێن زێدەبوونا دیاردا خوە کوشتنێ
ڤەدگەڕن بو ڕەوشا کەمپان و ڕەوشا ساخلەمیێ و چ کەسێن پسپورێن دەڕوونناس د ناڤ
کەمپان دا نینن ، هەروەسا ئەڤە پتر ژ شەش سالەیە د ناڤ خیڤەتێن بچویك دا خێزان
دژین و ئەڤە ژی بوویە ئەگەرێ تێکچوونا دەڕوونێ گەنجان. ژ لایێ دی ڤە پشتی
بەلاڤبوونا کورونایێ گەلەك کەس مانە بێکار و مانا ل مال ڤە بوو فاکتەرەك نەرێنی ل
سەر گەنجان و د ئەنجامدا بارێ دەروونی تێكچوویە. هەروەسا بکار ئینانا سوشیال
میدیایێ ب نەرێنی و پویتە پێنەدانا خێزانا بو گەنجان ژ ئەگەرێن دی نە. تێگەهشتنا
خێزانێ خالەك گرنگە پێتڤی بەحس کرنێ بو نەهێلانا دیاردا خوە کوشتنێ و هەرچەندە ل
کەمپان هندەك جارا کەسانێن پسپور دچن سەرەدانا ئاوارەیان بەلێ کاتی یە و چ
ئەنجامێن کاریگەر نابن . سەبارەت ئەنجامدانا تاوانا دژی ڤان گەنجێن خوە دکوژن کو
رێژا تەمەنێ وان دناڤبەرا ١٢ تا ٢٠ سالی دانە دیار نینە و مە چ پێزانین ل سەر
نینن.
جمال رشو حموکا ب ڤی ڕەنگی بەرسڤ ل سەر پرسیارێن مە دا:
بێ گومان رێژا خۆ کوشتنێ زێدە بوویە ب دیتنا ئەم ل چڤاکێ
خۆ دنێرن لێ مە چ ئامارێن دورست بەر دەست نینن.گەلەك ئەگەر ھنا ئەڤ دیاردە زێدە
بوونا ل چڤاكێ مەدا بو نموونە ، نەخوشیێن دەرەونی ، ئاریشێن چڤاکی و سوشیال میدیا
و بێ کاری و رەوشا ئابوری .ل خالا دەستپێکێ ژی مە دیار کر کو ئامارەکا دورست ل بەر
دەست نینە لێ کو خویاییە ئەو کەسێن خۆ دکوژن پتر رەگەزێن مێ نە و د تەمەنێ ۱٤ سالیێ تە ۲٤
سالیێدانە ئانکو ئەم بێژن قۆناغا سنێلا داینە . ئەم ب دروستاهی تشتەکی نەشێن بێژن
لێ چێدبیت ب هندەك رێکێن جیاواز توند و تیژی بەرامبەرا وان هاتبێ کرن نموونە ب
رێکا سۆشیال میدیا. پسپۆر و شارەزایێن دەروونی ل ناڤ کەمپان دا هەنە لێ پتریا وان
نا ب سەر جهەکی ڤەنە لێ هندەک دناڤ رێکخراوان هەینە لێ رۆلێ رێکخراوا یێ کێمە ب
تایبەتی ئەو رێکخراوێن دڤی بواریدا کار دکن.ئەم نکارن ئەڤ دیاردە ب ئێکسەری نا
مینێ ژ بەر کو ل جیهانێ هەمووێ ئەڤ دیاردە هەیە و ب گورەی ئامارێن نێڤدەولەتی سالانە ٨۰۰ هزار کەس خۆ د سالەکێدا دکوژن لێ ئەم کارن کێم بکن ل کۆمەلگەها مەدا ئەم
پیتەیێ بدنە نەخۆشیێن دەرونی و بێنە چارەسەرکرن ل دەڤ پسپۆران ،ژبەر ئەوێن خو د کوژن
بتریا وان نەخوشێن دەروونی هەنە، دیاردا خوە کوشتنێ نە بتنێ د ناڤ کەمپان دا بەلکی
ل ناڤ باژێری ژی دا هەیە بەلێ ب شێوەیەكێ کێمتر.
شیرین عبداللە عثمان ب ڤی شیوەیی بەرسڤ ددت :
مە چ ئامارێن دروست ل بەر دەست نینن بەلێ رێژەیا خوە
کوشتنێ بەرەڤ زێدەبوونێ ڤە چوویە تایبەت د ناڤ ئاوارەیان دا. خەلك گەلەك یێ بێزار
بووی د ناڤ کەمپان دا و رێژەیا بێکاریێ گەلەك کارتێکرن ل سەر خەلکێ کریە تایبەت
گەنجان چونکی خەلك پێتڤی ب گەلەك خزمەتگوزاریان هەیە چ تایبەت بن چ گشتی. پتریا
کەسێن خوە دکوژن کچن و تەمەنێ وان یێ بچویکە و پێتڤییە ئەڤ کەسە بهێنە تێگەهاندن ژ
لایێ رێکخراو و حکومەتێ ڤە و زیان و ئەنجامێن خوە کوشتنێ بو وان بهێنە ڕون کرن.
هەلبەت ژ بەری خوە کوشتنێ دبیت هاتبن بێزار کرن یان دەستدرێژی ل سەر وان هاتبیت
کرن ، پێتڤیە سمینار بو کچان و گەنجان بهێنە سازکرن دەربارەی پەیوەندیێن لگەل ئێك
و ژیانا هەڤژینیێ بهێتە قەدەغەکرن بو گەنجێن د بن ژیێ ١٨ سالیێ دا و دویڤچوونەك بو
ڤی بابەتی بهێتە کرن ، هژمارەکا کێم ژ دەروونناسان د ناڤ کەمپان دا یێن هەین و د
شیاندا نین ب ڤێ هژمارێ ئەڤ دیارە بهێتە کێمکرن و دڤێت حکومەت و لایەنێن بەرپرسیار
ڤی بابەتی ب جددی وەربگرن .
ماموستا فاروق جمیل ، ماموستا ل زانینگەها دهوك و پسپور
د چارەسەریا دەروونی دا دا دیار کرن :
خوە کوشتن دیاردەیەکا جیهانی یە و ل سەر ئاستێ جیهانێ
هەمیێ هەیە و ل چ وەلاتان شیان نینن رێگری ل ڤێ دیاردێ بهێتە کرن و ب پیشکەفتنا
جیهانێ خوە کوشتن ژی بەردەوام دبت. رێکخراوا ساخلەمیا جیهانێ دیار دکەت کو د هەر
٤٠ چرکەیان دا کەسەك دویماهیێ ب ژیانا خوە دئینیت. ڕێك هەنە بو کێمکرنا ڤێ دیاردێ
وەك گهوڕینا شێوازێ پەروەردەکرنێ و گرنگی دان ب بابەتێن وەك ئاڤاکرنا کەسایەتی و
ساخلەمیا کەسی و ساخلەمیا دەروونی . پێتڤییە کەسێن پسپور د ناڤ جڤاکی دا هەبن
تایبەت د قوتابخانە و د ناڤ رێکخراوێن سڤیل دا.دڤێت ئەڤ رێکخراوە ل سەر وێ چەندێ
کار بکەن بو گرنگی دان ب لایەنێن جڤاکی و موکمکرنا پەیوەندیێن جڤاکی و دان و
ستاندن و ئاستێ ڕەوشەنبیری بهێتە بلند کرن د هەمی بیاڤان دا. هەروەسا ب دیتنا من
پێتڤییە گرنگیەك مەزن ب سنێلەیان بهێتە دان و بهێنە پەروەردە کرن ب رێکێن دروست
چونکی کەسێن دویماهیێ ب ژیانا خوە دئینن سنێلەنە و ب رێکا دەزگەهێن مەدەنی گرنگی ب
ڤی چینی بهێتە دان. دا کو کەسایەتیا خوە ئاڤا بکەن. دەربارەی ئەگەرێن خوە کوشتنا
گەنجان ژی دشێن بێژین توندوتیژیا خێزانێ و بکار ئینانا ماددێن هوشبەر و کحول و
هەروەساس وشیال میدیا کو ب رەنگەکێ دویر ژ ڕاستیێ بابەتان بەلاڤ دکەن و خوە کوشتن
بوویە چاڤلێکرن د ناڤ گەنجا ندا. ژ بەر کو چ ڤەکولینین زانستی نینن دەربارەی
زێدەبوونا خوە کوشتنێ د ناڤ گەنجێن ئاوارە دا ل کەمپان د شیاندا نینە ب تێر و
تەسەل بەحس بکین بەلێ بارێ دەروونی و جەستەیی یێن ئاوارەیان خراب بوویە و کێماسی
یێن هەین ، دیسان ئەڤ کەسێن خوە دکوژن دبیت ئەگەرێن بایولوژی ژی هەبن بو نموونە
ئاریشا میشکی یا بوماوەیی یان ژ دایكبوونی و هەروەسا فاکتەرێن ماددی ژی یێن هەین
کو تاکەکەس دویماهیێ ب ژیانا خوە بینت ژ
بێ چارەیێ. و جڤاك و داب و نەتیر ژی کاریگەرە ل سەر خوە کوشتنا تاکەکەسی . نموونێن
رێگریێ ل هندەك وەلاتان هەنە بو نموونە ل وەلاتێ چینێ پشتی هژمارەکا بەرچاڤ ژ
کەسان دویماهی ب ژیانا خوە ئیناین ب رێکا بکار ئینانا خوارنێن ئاژەلان کو ماددێن
کوژەك د ناڤدا هەبوون ئێدی کارگەهان ئەو ماددە ژ ماددێن بێ زیان بەرهەم ئینان و چ
زیان ل مروڤان نەبیت دەمێ بکار دئینن ب مەبەستا خوە کوشتنێ و هەروەسا ل ویلایەتێن
ئێکگرتیێن ئەمریکا رێکخراوێن سڤیل ڕابوون ب هلاویستنا لافیتە و درویشما ل وان جهێن
خەلك دویماهیێ ب ژیانا خوە دبینت یا نجهێن خەلك مشە لێ هاتن و چوونێ دکن و بەحس ژ
خوەشی و ئارامیا ژیانێ دکرن دا کو تاکەکەس ب هێڤی نەبت و دویماهیێ ب ژیانا خوە
بینیت.
ئامادهكردنی :هێلین میدیا