یه‌كێتی ئافره‌تانی كوردستان سه‌ردانی كه‌مپی بێرسڤ-یان كرد

   ‌رێكه‌وتی 17ی شوباتی 2021 له‌ کەمپی بێرسڤی دوو له‌ زاخۆ كه‌  خوشک و برا ئێزدییه‌كانی تێدا نیشته‌جێن، رووداوێكی ئاگركه‌وتنه‌وه‌ روویدا كه‌ بووه‌ هۆی گیان له‌ده‌ستدانی سێ كه‌س و برینداربوونی ژمارەیەکی دیکە.
.
 رۆژانه‌ به‌هۆی خراپی بارودۆخی كه‌مپه‌كان ئاواره‌كان توشی كێشه‌ وگرفت ده‌بنه‌وه‌، به‌تایبه‌ت ئافره‌تان و منداڵان پێویستیان به‌هاوكاری و پاڵپشتی هه‌موو لایه‌ك هه‌یه.

" دڵڤین خه‌له‌ف" ئه‌ندامی سكرتارییه‌تی یه‌كێتی ئافره‌تانی كوردستان ده‌ڵێت: ئه‌مڕۆ به‌ نوێنه‌رایه‌تی مه‌كته‌بی سكرتارییه‌ت و به‌یاوه‌ری ستافی ئه‌نجومه‌نی زاخۆ و شنگالی رێكخراوه‌كه‌مان وه‌ك هه‌ستكردن به‌ به‌رپرسیارێتی و له‌نزیكه‌وه‌ ئاگاداربون له‌ بارودۆخی ناو كه‌مپه‌كان به‌تایبه‌ت ئه‌و خێزانانه‌ به‌هۆی ئاگركه‌وتنه‌وه‌كه‌ زیانیان به‌ركه‌وتوه‌، سه‌ردانی ئیداره‌ی كه‌مپه‌كه‌مان كرد و گفتوگۆمان له‌ چۆنیه‌تی چاره‌سه‌ركردنی كێشه‌ی ناو كه‌مپه‌كان و هه‌ماهه‌نگی به‌رده‌وام له‌پێناو خزمه‌تكردنی زیاتر به‌ خێزان و ئافره‌تانی ناو كه‌مپه‌كه‌ كرد.

 وێڕای هاوخه‌میان بۆ قوربانیانی ئه‌و رووداوه‌ دڵته‌زێنه‌، ‌یه‌كێتی ئافره‌تانی كوردستان داوا ده‌كات كه‌ به‌زووترین كات ڕێكه‌وتننامه‌ی شنگال جێبه‌جێ بكرێت و خوشك و برا ئێزیدیه‌كان بگه‌ڕێننه‌وه‌ بۆ شنگال و زێدی خۆیان، بۆئه‌وه‌ی له‌و ژیانه‌ پڕ سه‌خت و ناهه‌مواره‌ رزگاریان بێت و دوباره‌ ده‌ست بكه‌نه‌وه‌ به‌ ئاوه‌دانكردنه‌وه‌ی شنگال.