پەیامی یەکێتی ئافرەتانی کوردستان لە ٤٧ ەمین ساڵیادی لەسێدارەدانی لەیلا قاسم
لە چل و حەوتەمین ساڵیادی لەسێدارەدانی لەیلا قاسم، سڵاو
و درود بۆ ڕۆحی بەرزەفڕی دەنێرین. لەیلا قاسم لە قۆناخێکی هەرەسەختی مێژووی
گەلەکەمان، لە پایتەختی زۆرداری و ستەمەوە لەپێناو ئازادی کوردستان چالاکی و
ڕێکخستنی سیاسی بەڕێوەبرد و سەری بەرزی بۆ فشار و ئەشکەنجەی ستەمکارانی بەعس دانەنواند. بە سرودی ئەی ڕەقیب
و بروایەکی پۆڵاین بە کوردایەتی و ڕێبازی پیرۆزی بارزانی چووە بەر پەتی سێدارە و
هەرمان و نەمری هەڵبژارد. بەوەش سەلماندی کە ئافرەت نەک هەر دەتوانێ ئەرکی خۆی
بەرامبەر نەتەوە و نیشتمان بەجێبێنی، بەڵکو پێشڕەو و پێشەنگی تێکۆشانە.
نەبەردی لەیلا قاسم و خۆڕاگری و ڕادەستنەبوونی بۆ
ئیرادەی ڕژێمی دیکتاتۆر بوو بە فاکتەرێکی سەرەکی بۆ بەهێزبوونی بڕوای نەتەوەیی و
تێکۆشانی ئازادیخوازیی و پەیوەستی هەزاران لە ڕۆڵەکانی نیشتمان بە ڕێبازی پیرۆزی
بارزانی و کوردایەتییەوە، هەربۆیە یاد و بیرەوەری هەمیشە بە نەمری دەمێنیتەوە.
بۆئەوەی ئاسۆی ڕزگاری نەتەوەیی و خەباتی پیرۆزمان بۆ
کوردستانێکی یەکسان ڕووناک و درەوشاوەبێ، ئێستا لە هەموو کات زیاتر پێویستیمان بەو
باوەڕ و ئازایەتیەیە کە لە دەرون و باوەڕ و ئەزموونی خەباتی لەیلا قاسمدا هەبوو تا
بتوانین لە ئاست ئەرکی پیرۆزی ڕزگاری نەتەوەیی و کاریگەری ڕۆڵی ئافرەت بین لەو بوارە
سەرەکییەی ژیانی گەلەکەمان.
ئێمە لە یەکێتی ئافرەتانی کوردستان، شانازی بە لەیلا
قاسم دەکەین و یاد و بیرەوەری بەرز و پیرۆز ڕدەگرین و پەیمان دەدەین کە هەمیشە
شوێنپێهەڵگری هەنگاوەکانی ڕێی تێکۆشانی ڕزگاری و سەرفرازی ئەو سمبولە باڵایەی
خەباتی کوردایەتی و ئازادی کوردستان دەبین.
درود بۆ ڕۆحی لەیلا قاسم و هەڤاڵانی شەهیدی و گشت
شەهیدانی کوردستان و سەروەری شەهیدان بارزانی نەمر و کاک ئیدریسی هەمیشەلەیاد.
یەکێتی ئافرەتانی کوردستان
١٢/٥/٢٠٢١