ئافرەتا کورد و ئازادی

 
نەژادپەرێسی و شوفینیزما هەر گەل و رژێمەکا دیکتاتۆر ل رۆژهەلاتا ناڤەراست د دەرهەقێ مللەتێ کورد دە مەزنترە ژ ڤیان و پەرستنا وان دەرهەق ئۆل ئاینا وان و هەموو جاران وەلاتێن نەحەزێن گەلێ مە بابەتێ ئۆلپەرێسی وئاین ژەنی ژ بۆ چەوساندنا مافێ کوردان ب کارئینایە و بووینە رێگر د پێشیا ئازادیا هزروبیرێن وان نەتەوەپەرسی دە و هەموو هەول و بزاڤ ژ بۆ پووچەلکرنا هەستێ نەتەوەیێ یێ هەر تاکەکەسەکی کورد ل هەر جیهەکی داینە و بێ جوداهیا رەگەزی دناڤ بەرا ئافرەت و زەلامێن کورد د هەموو بواران دە.
نەیە ڤەشارتیە کو گەلێ کورد ل هەر وەلاتەکی هاویردۆر وەکو کەسەکی بیانی دهێتە ناساندن و دناڤ وەلاتیێن زۆرینە یێن خودان دەستهەلات دە دانوستاندنەکا خراب و نەشایستە دگەلدا دهێتە کرن و بچاڤەکی نزم و بچوک بەرێ خۆ ددەنێ و ناهێتە هەژمارتن وەکو هاولاتیێ خۆجهێ وی وەلاتی کو دناڤدا ژیانا خۆ دبەنەسەر، ئەڤە کو سەرەرایی ئەو کەسێ کورد ژی وەکو هەر کەسەکێ دی هەلگرێ ناسناما وی وەلاتیە و پشکدارە د ئەرک و مافێ گشتی دە.
لێ بمخابنی ڤە هەموو دەمان و ژهەر ئەگەرەکێ دەست هەلاتدارێن رژێمێن ئەوان وەلاتێن داگیرکەر رێگری ل هەبوونا کەسایەتیا هاولاتیێن کورد کریە و مافێ وی یێ رەوا پوچەل کریە و زولم و زۆرداریەکا بێ وژدان لێ کریە و بوویە ئاستەنگیەکا مەزن ژ بۆ گەهاندنا ئارمانجێن وی یێن سەرەکی.
هەر وەسا ئافرەتا کورد ژی بێ بەهر نەبوویە ژڤێ دەردەسەریێ و بن دەستیێ بەلکو هەموو جارا ئافرەتا کورد بوویە قوربانی و باجا ئازادیا گەلێ خۆ دایە ل ئەوان وەلاتێن خاکا کوردستانێ داگیرکرین و مافێ گەلێ وێ پووچەلکرین، و هەموو دەما ئافرەتا کورد دوان وەلاتان دە وەکو دیل و ئێخسیر خۆ دیتیە.
کوشتنا کچا کورد (ژینا ئەمینی) لسەر وێ چەندێ نەبوویە ژ بەر هەکە سەرێ خۆ دانەپۆشیە و ئەو چەندە بوویە ئەگەرێ تێکدانا دابونەریتێن ئۆلی یێ وی وەلاتی بەلکو بابەت ب بیروبۆچۆنێن وێ یێ نەتەوەیی ڤە گرێدای بوویە و ئافرەتەکا وەلات پارێز و نشتیمان پەروەر بوویە، لەوا بڤی رەنگێ هۆڤانە و دویر ژ رەوشت و هەموو دابونەریتێن مرۆڤایەتیێ هاتیە ئەشکەنجەدان و پاشی ژیانا خۆ ژ دەستدایە.
گەلێ کورد ب هەزاران (ژینا ئەمینی) تێدە هەنە و خەبات و تێکۆشینا ڤی مللەتی ب زولم و زۆرداریا دوژمنی راناوەستێ و کوشتنا کچ و کورێن گەلێ مە پێخەمەت ئازادیا کوردستانێ شانازیە و هەموو گەلێ کورد بڤێ چەندێ سەربلندە و هەروەها روورەشی و شەرمەزاریەکا مەزنە ز بۆ دوژمنێن داگیرکەر بکوژێن ئافرەتێن کورد یێن ئازا و دلێر.
هەزار سلاڤ لسەر گیانێ پاقژێ ئافرەتا کورد یا دلێر (ژینا ئەمینی) و مرن بۆ بکوژێن ئازادیا مللەتێ مە.