ئافرەت و مێژوو
ئەگەر بەویژدان و بەچاوێکی دوور لە نێرسالاریییەوە
سەیری مێژووی کورد بکەین، دەیان و سەدان ئافرەت دەبینین کە شانبەشانی پیاوان و هەندێکجاریش
لە پیاوان کاریگەرتریش رۆڵیان بینیوە لەخەباتی سیاسی، جڤاکی و نەتەوەییدا و زۆرێک
لەو ئافرەتانەیش قوربانیان بە گیانی خۆیان داوە و چاونەترسانە تا سنووری مەرگ داکۆکیان
کردووە. لەیلا قاسم نموونەیەکی زیندووی ئەو خەبات و قوربانیدانەیە، عادیلە خانم و
حەپسەخانی نەقیب و خانزادی میری سۆران و ناهیدەی شێخ سەلام و دەیان ئافرەتی دیکەش،
نموونەی ئەو ئافرەتانەن کە خەباتی سیاسی و کۆمەڵایەتیان پێکەوە گرێداوە و ڕووبەڕووی
دۆخی چەقبەستوو و دواکەوتووی کۆمەڵگەکەیان بونوەتەوە و توانا و لێهاتویی ئافرەتی
کوردیان سەلماندوە و دووپاتکردۆتەوە.
ئەمە سەرەڕای هەزاران ئافرەتی دیکە کە
لەبواری کۆمەڵایەتی و خێزانییدا قوربانی زۆریان بە گیان و ژیانی خۆیان داوە و و هەزاران
ئافرەتیش لەجەنگ و ڕووبەرووبونەوەکانی خەبات و شۆڕش و بزووتنەوە یەک لەدوای یەکەکانی
کورد دژی داگیرکەران بەدیل گیراون و براون یان شەهید کراون یان دەستدرێژیان کراوەتەسەر
یان خۆیان کوشتوە بۆئەوەی دەست داگیرکەر نەکەون. زیندووترین نموونەش ئافرەتانی ئێزدی
کەلەلایەن داعشەوە رفێنران و هەموو ئەو کچ و ژنانەی لەپڕۆسەی ئەنفالی بەدناودا
کران بەژێر خۆڵەوە و بێ سەروشوێن کران و یان ئەو ئافرەتانەی شەهیدی کیمیابارانی هەڵەبجە
و ناوچە جیاجیاکانی دیکە و ئافرەتانی شۆڕشەکانی دیکە لە پارچەکانی دیکەی کوردستان
کە بەسەدان و هەزارانن.
بەڵام بەداخەوە ئەم هەموو قوربانیدانەی
ئافرەتان لەلایەن مێژوو نووسان و حیکایەتخوانانی مێژوو و دیرۆکەوە نادیدە گیراوە و
بەدەگمەن نەبێت، ئاماژە بەهیچیان نەکراوە تەنها لەم ساڵانەی دواییدا نەبێت، بۆ
نموونە ئەگەر تەماشای کتێبی شەڕەفنامەی شەڕەفخانی بەدلیسی بکەین(١٥٤٣-١٦٠٤) دەبینین
ئافرەت بەتەواوی پەراوێزخراوە و ئاماژەی پێنەکراوە چونکە ئەو مێژووە و هەموو مێژووە
نووسراوەکانی تریش، بەداخەوە! بەشێکی زۆریان تەنها پیاوانیان بینیوە و پێیان شورەیی
بووە یان بەکەمیان زانیوە باسی ئافرەتان بکەن و زیاتر لەڕوانگەی نێرسالارییەوە
نوسراوەتەوە، جگەلەوەش، زۆربەی زۆری ئەو مێژوەی نووسراوەتەوە، بریتی بووە لە مێژووی
سیاسی و چەکداری و سەرکردە و میر و دەسەڵاتدارەکان و مێژووی کۆمەڵایەتی بەتەواوی فەرامۆش
کراوە.
تا ئەم ساڵانەی دواییش، مێژوو هەر مێژووی
سیاسی و سەرکردە و دەسەڵاتدار و پیاوان بووە و زۆر کەم مێژووی کۆمەڵایەتی و لەناویشیدا
مێژووی ئافرەتان بووە بۆیە ئەرکێکی گرنگ و پێویستە، بۆلەمەودوا توێژەران و مێژوو
نووسان و ئافرەتان خۆیان رووبکەنە بواری لێکۆڵینەوەی مێژوویی و چەند پێیان دەکرێت و
بۆیان دەکرێت مێژووی ئافرەتان هەم لەرووی سیاسی و خەباتی چەکداریی، هەمیش لەڕووی کۆمەڵایەتی
و فەرهەنگی بنووسنەوە تا ئافرەتانیش وەک پیاوان کە سەدان ساڵ لەدەرەوەی مێژوو
بوون، بهێنرێنەوە نێو مێژوو و رۆڵ و کاریگەرییان لەبەرچاو بگیرێت و توانا و لێهاتوویی
و گرنگیان لە سازکردنی مێژوودا دووپاتبکرێتەوە.