ئافرەت و جڤاك
هەر وەکو دیار رەوشا هەر کۆمەلگەهەکا سەرفەراز
ئافرەتەکا سەرکەفتی بوویە و دژیانا هەر جڤاکەکی ساخلەم دە ئافرەتەکا ئازا و ژیرە هەبوویە
و هەر وەلاتەکی پێشکەفتی ئافرەتەکا خودان شیان و ژێهاتی و خەباتکەر بەرەڤانی ژێ کریە
و پاراستیە و ئاڤەدان کریە و پەروڤاژی ڤێ چەندێ ژی هەر کۆمەلگەهەکا پاشڤەمایی و رێز
ل ماڤێ ئافرەتان نەگرتی و دانوستاندنەکا شاش و نەرەوا دگەل دا کری و باوەری ب هێز
و شیانێن وێ نەهینایی مایە پاشڤەمایی و ئەو وەلات نەهاتیە ئاڤەدان کرن و بەرف
قوناغەکا خراب ڤە چوویە.
هەروەها ل وەلاتێ مە ژی ئافرەتا کورد سەرەرای هەلویستێ
وێ یێ نەتەوەیی و مکوم دەربارەی دۆزا رەوا یا ڤی مللەتێ کارتێکرنەکا مەزن لسەر کۆمەلگەهێ
هەبوویە و جڤاکا مە ب بیرو بۆچوونین خوە یێن زەلال زەنگین کرینە و هەموو دەما هەولێن
ئاڤدانیا کۆمەلگەهەکا شارستانی ئارمانجا وێ بوویە و لهەر ئاستەکی ژیانێ دە یا سەرکەفتی
بوویە لەوما پیدڤیە هەردەم رێزەکا تایبەت ل شیانێن ئافرەتا کورد بێتە گرتن و سەرەدەریەکا
باش د گەلدا بێتە کرن.
*- مافێ ئافرەتێ: هەر وەکو
تەڤایا ئافرەتێن جیهانێ ئافرەتا کورد ژی د هەموو بوارین ژیانێ دە مافەکی سروشتی و
رەوا د وەلاتێ خوە دە هەیە و بهیچ رەنگەکی نە جهێ رەزامەندیا وێیە کو ژ شانێ وێ بهێتە
کێمکرن یان ژی بجاڤەکی بچوکتر د کۆمەلگەهێ دە سەرەدەری دگەل بێتە کرن و مافی وێ بێتە
پوچەلکرن و فەرە ژ هەر وەلاتەکی ل جیهانێ بیتر رێز ل هەبوونا ئافرەتا کورد بێتە
گرتن ژبەر کو ئەوێ ژی هەردەم و د هەموو کاودانێن مللەتی مە تۆش بوویێ مل بملێ زەلامێ
کورد ئامادەیا خوە دایە خویاکرن و قوربانی دایە و بهیچ رەنگەکی ل همبەر دژواریا ژیانێ
خوە دوور نەدیتیە و خوە پاشڤەنەدایە بەلکو هەردەم پالپشت و پالدەرەکا خوەرت و بهێز
بوویە ژبۆ بدەستڤە هاتنا مافین رەوا یێن گەلێ خوە و گوهنەدایە کارتێکرنا دژوار یا
ئەنجامێن بەروڤاژی یێن زۆلم و زۆرداریا سیاسەتا چەوت یا دۆژمنان و بەردەوام پینگاڤ
ژبۆ گەهاندنا هەستێ نەتەوەیی و خوەرتکرنا ئاستێ نشتیمانپەروەری هاڤیتینە و بسەرکی
بلند داخوازا مافێ گەلێ خوە کریە و ئەڤ چەندە ژی ب نافێ خوە زانیە و لسەر بێ دەنگ
نەبوویە.
*- ئەرکێ ئافرەتێ: بێگومان
دناڤا هەر جڤاکەکی دە ئەرکەکی سروشتی دکەفتە سەر شانێ ئافرەتێ ژی و لسەر وێ فەرە ب
رەنگەکی شایستە ئەوی ئەرکی جی بەجی بکەت، راستە ئەرکێ وێ زەحمەتیەکا بەرچاڤ تێدا هەیە
و گەلەك جاران ژ وێ رە بوویە بارگرانیەکا مەزن بەلێ بەردەوامیا ژیانێ وێ چەندێ
دخوازێ کو هەڤپشکیا ئەرکی دناڤبەرا هەردوو رەگەزان دە ببە ئێك ژ گرنگیێن سەرکەفتنا
کۆمەلگەهێن شارستانی و خویا دکە کو ئەرکێ ئافرەتێ دهەموو بواران دە کێمتر ژ یێ زەلامی
نەبوویە. و هەروەها د بواری خزمەتکرنا جڤاکێ دە ژی رۆلەکی سەرەکی هەبوویە و خوە ژ
بوارێ پەروەردەکرنا نفشێن سەرکەفتی دە ژی خوە مامۆستایەکا رەهوان و ژیر دیتیە و ئەڤ
چەندە ژی وەکو ئەركەکی گرتیە سەر شانێ خوە
*- خوە پاراستنا ئافرەتێ:
هەبوونا كەسایەتیەکا بهێز ژبۆ ئافرەتێ دناڤا جڤاکەکێن پێشکەفتی دە باشترین بەرگریە
ژبۆ پاراستنا وێ ژ هەر دەردەسەریەکێ و بتایبەت دبوارێ شەرمێ و ترسێ دە فەرە هەر ئافرەتەك سەرەدەریەکا شایستە دگەل کەسێن بەرامبەری
خوە بکەت و خوە بخودان بیروباوەریەکا موکوم دناڤ کۆمەلگەهێ دە ببینێ و راستیا هەپشکیا
خوە د هەموو بوارین ژیانێ دە دگەل رەگەزێ نیر بدە خویاکرن و دەلیڤا ڤالاتیەکێ ژبۆ
گۆمانێ نەهێلێ و بڤی رەنگی هەر ئافرەتەك ژیهاتی وێ کەسایەتیا خوە پارێزێ و خوە سەرفەراز
دناڤ جڤاکا خوەدە بینێ.
*- بەرگریکرن ل ئافرەتێ:
بویە دەمەك دناڤ کۆمەلگەها مە یا کوردی دە و ژ هەموو پێکهاتین کوردستانێ لسەر بابەتێن
شەرەفێ ئافرەت دبە قوربانیا هزرو بیرێن پاشڤەمایی و سڤکایەتی ب هەستی وێ دهێتە کرن
و بێ کو کاربە بەرگریێ ژ بیرو بۆچوونێن خوە بکە دهێتە ئێشاندن و بەرە بەرە ئەڤ چەندە
ژی دبە دیاردەکا خراب لەوا پێویستە لسەر هەموو لایەنێن پەیوەندیدار و رێکخراوێن بەرگریێ
ژ مافێ ئافرەتێ دکەن و رێکخراوێن پشتەڤانێ مافی مرۆڤان رێکێ ل ڤان جۆرە کریارین دڕندە
و نەی رەوا بگرە و مافێ ئافرەتێ بپاریزە و رێزێ ل تایبەتمەندیا وێ بکە و پالپشتیێ
ل کەسایەتیا وێ بکە ژبەر کو ئافرەت جیهانا مرۆڤایەتیێ یە.