بۆئەوەی ئایندەمان مسۆگەربێت، دەنگ بە پارتی دەدەین
هەڵبژاردنی خولی داهاتووی ئەنجومەنی نوێنەرانی
عێراق کە بڕیارە لە١٠/١٠ بەڕێوەبچێت بۆ هەرێمی کوردستان گرنگیەکی زۆری هەیە، ئەمەش
لە سۆنگەی بارودۆخی ئێستای عێراق و گۆڕانکارییە چاوەڕوانکراوەکان لە ناوچەکەدا. هەڵبژاردن
یەکێکە لە بنەماکانی پرۆسەی دیموکراسی و هەر خۆی ڕێڕەوی دیموکراسی دیاری دەکات، چەمکی
هەڵبژاردن لە بنەڕەتدا چەمکێکی فرەڕەهەندی سیاسی کۆمەڵایەتی ئابورییە، ئەستەمە لە
یەک پێناسەدا مافی خۆی پێبدرێت، بەڵام لەبنەڕەتدا مەبەست لە بوونی چەند بژاردەیەک و بە باشزانینی
یەکێک یا خود زیاترلە یەکێکیانە و بڕیاردانە لەو بارەیەوە،دواتر شیکردنەوە و
هەڵسەنگاندنی دەرئەنجامەکانی بڕیارەکە و پێداچونەوەیەتی، ئەمەش پرۆسەیەکی
درێژخایەنی بەردەوامە بەتایبەت لە ئێستای سەروبەندی هەڵبژاردنی ئەنجومەنی
نوێنەرانی عێراق.
هەڵبژاردن
ئەگەر ڕێڕەوی دروستی خۆی وەربگرێت و دووربێت لە دەستێوەردان و فشار و پێشێلکاری
یاخود ئەگەر لە کۆمەڵگەیەکی دیمۆکراسیدا بەڕێوەبچێت تاکە ڕێگەی بونیاتنانی حکومەتی
هاوڵاتی و پاراستنی مافی هاونیشتمانیانە. لەبەر بارودۆخی ناسەقامگیری عێراق لەڕووی
ئەمنی و سیاسی و ناتەبایی لایەنە سیاسی و
مەزهەبییەکان و پێکدادانی بەرژەوەندییە ناوخۆیی و هەرێمی و نێونەتەوەیییەکان، چاوەڕوان ناکرێ پرۆسەی سیاسی و
هەڵبژاردن لە عێراقدا پرۆسەیەکی دیمۆکراسی ئاسایی بێ و هەموو ئەگەرەکانی فشار و دەستێوەردان
و پێشێلکاری لە ئارادایە.
هەرێمی کوردستان وەک هەرێمێکی فیدراڵی لە
چوارچێوەی عێراقدا، تا ڕادەیەکی زۆر توانیویەتی سەقامگیری خۆی ڕابگرێ و پێشکەوتن
لە سێکتەرە جیاوازەکان بەدەست بێنێ و پارێزگاری لە پێکەوەژیانی ئاشتیانە و
سەقامگیری باری ئەمنی بکات، کە ئەمەیان دیارترین خاڵی جیاکەرەوەی هەرێمە لە
ناوچەکانی دیکەی عێراق، هاوکات هەرێمی کوردستان وێرای هەموو فشارەکان تا ڕادەیەکی
زۆر توانیویەتی سەربەخۆیی بڕیاری سیاسی خۆی بپارێزێ و نەکەوێتە ژێر باری
بەرژەوەندییە هەرێمایەتییەکان. ئەو لایەنەش کە لە هەرێمی کوردستاندا پارێزگاری لەم
هێڵە دەکات بەدڵنیاییەوە پارتی دیمۆکراتی کوردستانە ئەویش بە سەرۆکایەتی ڕابەری
نەتەوەیی و نیشتمانی(سەرۆک بارزانی). هەربۆیە لە ڕوانگەی هەڵوێستەکانی پارتی و
بەرنامەی سیاسی پارتی دەتوانین بڵێن؛ پارتی جیاواز لە هەموو حیزب و لایەنەکانی
دیکەی هەرێمی کوردستان لەو هەڵبژاردنەدا بەشداری دەکات، ئەرکی پارتی لە هەمووان
قورسترە و ئامانجەکانی باڵا و مەزنن.
لە ڕابردوودا بینیمان بەهۆی دەستە و گروپی ناو هەندێک حیزب سازش لە مافە
نەتەوەیی و دەستوورییەکان کرا و لەگەڵ
نەیارانی کورد پێکهاتن کرا و ڕێکەوتنی ژێربەژێر بۆ ڕادەستکردنی خاک و نەهێشتنی
قەوارەی هەرێمی کوردستان کرا، بەردەوام دەبینین چۆن بەرەیەک کار لەسەر بە دۆزەخ
پیشاندانی هەرێمی کوردستان و لاوازکردنی هەڵوێستی سیاسی هەرێم لە بەغدا دەکات، بینیمان
کە پارتی، بۆ پاراستنی هەرێمی کوردستان چی قوربانییەکی دا و چۆن سەرکردایەتی
شەڕێکی سەختی نەتەوەیی کرد. هەربۆیە، پارتی، بە بەرنامەیەکی نیشتمانی فرەڕەهەند و
گوتارێکی کوردستانیانە دەچێتە نێو پرۆسەکە و بە ئامانجی بونیادنانی عێراقێکی دیمۆکراسی
فیدراڵی لەسەر بنەمای هاوسەنگی و هاوبەشی و سازان، بەرەنگاری هەموو ئەو هێزە
مەزهەبی و شۆڤێنیانە دەبێتەوە کە دەیانەوێ مافە دەستورییەکان لە کورد وەربگرنەوە و
دەسەڵاتی مەرکەز بۆ هەرێمی کوردستان بگەڕێننەوە، لە ناوخۆشدا پارتی بەرەنگاری
بەرەیەک بۆتەوە، کە دەیەوێ هەموو پرسی کورد لە داواکاری مووچەدا کورت بکاتەوە،
بەرەیەک کە ئامانجێتی ئینتیمای نەتەوەیی و نیشتمانی نەهێڵێت، بەرەیەک بە ئاسانی
سازش لە مافە دەستوورییە بەدەستهاتووەکان دەکات و دەیەوێت هەرێمی کوردستان بکاتەوە
بە سێ پارێزگاکەی پێش ڕاپەڕین.
لەو سۆنگەیەوە، دەنگ بە پارتی دەدەین، بۆئەوەی،
ئەم قەوارەیە کە تاکە ستاتۆی یاسایی و دەستوری کوردە وەک نەتەوە و تاکە ناوچەی
ئارام و سەقامگیر و گونجاوە بۆ ژیانکردن لەسەر ئاستی هەموو عێراق و سەرزەمینی
پیکەوەژیانی ئاشتییانەی پێکهاتە و ئایینە جیاوازەکانی مرۆڤایەتییە، بمێنێ و سەقامگیرتر
و پێشکەوتوتربێ. دەنگ بە پارتی دەدەین تا ئەوەی سەدان ساڵە پێشینانمان خەباتی بۆ
دەکەن بێ بەها نەکرێ، شکۆی مرۆڤانەمان پێشێل نەکرێ و میلیشیا و مەزهەبگەرا
توندڕەوەکان حوکممان نەکەن، دەنگ بە پارتی دەدەین تا دەنگە توندڕەو و توندئاژۆکان
بەرزتر نەبنەوە. دەنگ بە پارتی دەدەین تا بنەماکانی دیمۆکراسی تەنانەت لەناو
عێراقیشدا بەهێزتر بێ و ئەو وڵاتە وەڵامدەرەوەی خواست و داواکارییەکانی هەموو
پێکهاتە نەتەوەیی و ئایینی و ئایینزاکانی بێ وەک لە دەستووردا هاتووە، دەنگ بە
پارتی دەدەین بۆئەوەی کوردستان بەهێزبێ.