ئه‌نفالا به‌هدینان برینه‌كه‌ د له‌شێ نیشتیمانی دا

ئه‌نفالا به‌هدینان برینه‌كه‌ د له‌شێ نیشتیمانی دا
دلڤین شه‌مال
به‌ریا 36 سالان ل رۆژا 25 ته‌باخێ سالا 1988 هه‌تا 6 ێ ئیلۆنێ ، رژێما به‌عسا عیراقێ ل درێژاهیا زنجیره‌ تاوانێن خۆ ده‌رهه‌ق ب گه‌لێ كوردستانێ ، پشكه‌كا زۆر مه‌زن گوندو ناوچه‌یێن ده‌ڤه‌را به‌هدینا  ئێخستن بن شالاوا ئه‌نفالێ ، ئه‌وا ل ده‌ست رژێما به‌عس هاتی به‌رامبه‌ر گه‌لێ كورد كریه‌ كیمیا باران و ئه‌نفال و كوشتن و ڤه‌گۆهاستن و زیندانیكرن ، تاوانا مه‌زنا كوردان ب تنێ ئه‌و بوو كورد بوون.
ب درێژاهیا دیرۆكێ رژێما به‌عس زیان گه‌هاندیه‌ كوردا ل هه‌رجهه‌كێ بن تاوانا ئه‌نفالێ كو ژ گه‌میان هه‌تا دووماهیك قۆناغ ل به‌هدینان 182 هزار وه‌لاتیێن بێتاوانێن كوردستانێ تێدا بوونه‌ قوربانی وهاتنه‌ شه‌هیدكرن ، حكومه‌تا عیراقێ یا نوكه‌ گه‌له‌ك یا كێمخه‌مه‌ به‌رامبه‌ر كه‌س و كارێن ئه‌نفالان پێدڤیه‌ ب زۆترین ده‌م هه‌موو بهێنه‌ قه‌ره‌بووكرن كارێن مه‌زن ژی بهێنه‌ كرن كو تاوانا ئه‌نفالێ بهێته‌ دۆكیۆمێنتكرن و بۆ وێ چه‌ندێ ل سه‌ر ئاستێ جیهانێ ب جینۆساید بهێنه‌ ناسین.
د هه‌ر قۆناغه‌كێ دا بیت كوردا به‌رده‌وام پێدڤی ب ئێكگرتنێ و ئێكرێزیێ هه‌یه‌ بۆ دووباره‌ نه‌بوونا شالاوا ئه‌نفالێ ، ژبه‌ركو هه‌تا نوكه‌ له‌شێ كوردا تژییه‌ ژ برینێن بێ ده‌رمان و كویر ، ئه‌نفالا به‌هدینا ئێكه‌ ژ وان قۆناغێن نه‌خۆش كو ب سه‌ر میلله‌تێ مه‌ دا هاتی و زیانه‌كا مه‌زن گه‌هاندیه‌ كه‌س  و كارێن مه‌ ل به‌هدینا  ، ئه‌نفالا به‌هدینا برینه‌كا كویره‌ د له‌شێ نیشتیمانی دا.
د 36 سالیا بیرئانینا ئه‌نفالا به‌هدینان دا پتر هه‌موو قوناغه‌كێ پێدڤیه‌ ئێكگرتی بین و به‌ره‌ڤانیێ ژ ده‌ستكه‌فت و ئاخ و ئالا و پیرۆزیێن نیشتیمانێ خۆ بكه‌ین .