یاسای نوێی باری کەسێتی عێراق: پێویستی چاکسازی بۆ پاراستنی مافی ژنان و خێزانی تەندروست

یاسای نوێی باری کەسێتی عێراق: پێویستی چاکسازی بۆ پاراستنی مافی ژنان و خێزانی تەندروست

لەم ڕۆژانەدا، عێراق شاهیدی گۆڕانکارییەکی گەورەیە لە یاسای باری کەسێتیدا کە بەداخەوە هەنگاوێکی گەورەیە بەرەو دواوە لە بواری مافی مرۆڤ و بە تایبەتی مافی ژنان و منداڵان. ئەم یاسایە کە ڕێگە دەدات بە هاوسەرگیری کچان لە تەمەنی 9 ساڵییەوە، نەک تەنها پێشێلکردنێکی ئاشکرایە بۆ مافی منداڵان، بەڵکو هەڕەشەیەکی گەورەیە بۆ سەر داهاتووی کۆمەڵگا و خێزانی تەندروست لە عێراقدا.

ئێمە باوەڕمان وایە کە خێزانی تەندروست و بەهێز تەنها لەو کاتەدا دەتوانێت بناغەیەکی پتەوی هەبێت کە مافەکان و ئیمتیازاتی هەردوو ڕەگەز تیایدا یەکسان بێت. یاسای نوێ بە ڕێگەدان بە هاوسەرگیری منداڵان و پێدانی دەسەڵاتی زیاتر بە پیاوان بۆ فرەژنی بەبێ ڕەزامەندی ژنی یەکەم، ئەم هاوسەنگییە گرنگە تێکدەدات و ژنان لە مافە سەرەتاییەکانیان بێبەش دەکات.

بۆ کەمکردنەوەی ڕێژەی تەڵاق و لێکترازانی خێزانی، پێویستمان بە بیرکردنەوە و هزری پێگەیشتوو هەیە لە پرۆسەی هاوسەرگیریدا. هاوسەرگیری لە تەمەنێکی زۆر کەمدا، نەک تەنها ئەم پێگەیشتنە دەخاتە مەترسییەوە، بەڵکو دەبێتە هۆی زیادبوونی کێشە کۆمەڵایەتی و تەندروستییەکان.

مافی بڕیاردان لە چۆنیەتی ژیانی ژن و پیاودا دەبێت بە شێوەیەک بێت کە هاوسەنگی بپارێزێت و دەرفەت بدات بە هەردوولا بۆ گەشەسەندن و سەرکەوتن لەو بوارانەی کە تێیدا بەهرەمەندن. یاسای نوێ بە سنووردارکردنی مافەکانی ژنان، ڕێگر دەبێت لە بەشداری تەواویان لە کۆمەڵگادا و لە گەشەپێدانی توانا و لێهاتووییەکانیان.