یهكێتی ئافرهتانی كوردستان راگهیاندراوێكی سهبارهت بەشودانی کچانی منداڵ و بەخشینیان لە بری قەرز بڵاوكردهوه
هەرێمی کوردستان وەک قەوارەیەکی دەستوری لەسەر بنەماکانی
مافی مرۆڤ و هاوڵاتیبوون دامەزراوە و مافەکانی مرۆڤ بە گشتی و مافی منداڵ و ئافرەت
بە تایبەتی لە چوارچێوەی پرسە گرنگی پێدراوەکانن و هەموومان دڵخۆشین کە بەردەوام
ڕێژەی کچان لە قۆناخەکانی خوێندندا ڕووی لە بەرزبوونەوەیە و هەر ئەمساڵیش بەرزترین
ڕێژەی یەکەمەکان لەسەر ئاستی قۆناخی ئامادەیی قوتابیانی کچ بوون.
پێشکەوتنەکان مایەی شانازی و دڵخۆشیمانە و لەهەمانکات
ڕوودانی چەند حاڵەتێکی نامۆ بە کولتورمان و هاودژ بە بەها مرۆڤایەتی و
شارستانییەکان یەکجار نیگەران و توڕەمان دەکات.
بەشودانی کچانی منداڵ و بەخشینیان لە بری قەرز؛ پێشێلکردنی
مافی منداڵ و توندوتیژییە بەرامبەر ڕەگەزی مێ هاوکات سەرپێچی یاسا و بێڕێزیکردنە
بە بەها و سیماکانی کۆمەڵگەکەمان.
هەردوولایەنی هەر ڕووداوێکی لەو شێوەیە لە خێزانی کچ
هەروەها ئەو پیاوەی کە لایەنێکی دیکەی ئەو حاڵەتانەیە ئەوانەش کە شەرعیەت بە
گرێبەستێکی لەو شێوەیە دەدەن بەهەر پاساوێک و لەژێر هەر ئایدۆلۆژیایەک بێت،
تاوانبارن بەرامبەر بە یاسا و بەرامبەر بە بەها و نۆرمە پێشکەوتووەکانی کۆمەڵگە و
هەنگاوەکانی ڕوو لە پێشکەوتن و کرانەوە. باوکەکان باوکی منداڵەکانن نەک خاوەنی
منداڵەکان تا بە خواستی خۆیان مامەڵە و سەودایان پێ بکەن و وەک کاڵا مامەڵەیان
پێوە بکەن. دەبێت هەموو لایەک بزانن جیاوازییەکی زۆر هەیە لە نێوان ئەرکی
باوکایەتی و چەمکی خاوەنداری. تاوانی لەو شێوەیەش مافێکی گشتییە و تەنها خێزانەکان
بەرپرس نین لە چارەنووسی منداڵەکان.
ئەو ڕووداوە تاوانە و؛ دەبێت دەسبەجێ ڕابگیرێ و هەموو
ئەوانەش کە دەستیان لە ڕوودانیدا هەبووە ڕووبەڕووی یاسا بکرێنەوە.
هاوکات خۆشحاڵین کە بەرامبەر ئەو تاوانە ئیدانەکردنێکی
گشتیمان بینی لە تۆڕە کۆمەڵایەتییەکان و چین و توێژەکانی کۆمەڵگەکەمان، ئەوەش
مایەی گەشبینیی و ئومێدە کە ڕای گشتی کۆمەڵگە بەو ئاستە هۆشیارە و لە ئاست ڕووداوە
نامرۆڤانەکان بە هەڵوێستە. هاوکات سوپاسی دەزگاکانی ڕاگەیاندن دەکەین کە ڕێگە
نادەن تاوانی لەو جۆرە پەردەپۆش بکرێ و لە نێو چواردیوار و دیوەخانەکان دەیهێننە
بەردیدی ڕای گشتی.
ئەوانە ئومێدمان پێ دەبەخشن و دڵنیایین کە کۆمەڵگەکەمان ئەم
قۆناخە بە ئاڕاستەی پێشکەوتن و شارستانیبوون تێدەپەڕێنێت.
یەکێتی ئافرەتانی کوردستان
28/11/2020