سودەکانی وەرزشی مەلەوانی
سودەکانی وەرزشی مەلەوانی
مەلەکردن یەکێکە لەو وەرزشانەی کە دەتوانی هەر لە تەمەنی گەنجییەوە ئەنجامی بدەی تا پیربوون و وەرزشێکی گونجاوە بۆ تەندروستی جەستەیی و دەروونی ، وەرزشێکە بەرگری لەش زیاد دەکات لەچاو وەرزشەکانی تر .
لێرەدا هەنێ لە سودەکانی وەرزشی مەلەوانی دەخەینە روو : -
١- مەلەکردن دەبێتە هۆی خۆشحاڵی و دەروون ئارام دەکاتەوە و ئاستی دڵەڕاوکێ و خەمۆکی کەمتر دەکاتەوە و پەیوەندی کۆمەڵایەتی بەهێز دەکات .
٢- مەلەکردن کاردەکاتە سەر بەهێزبوونی بیرەوەری و توانای بیرکردنەوە باشتر دەکات و رێژەی ئەنسۆلین لەخوێندا رێک دەخات و کاردەکاتە سەر گەشەکردنی خانە نوێیەکان لە مێشکدا .
٣- مەلەکردن کالۆری زیاتر دەسوتێنێت وەک لە ڕاکردن ، کاتێک مەلەکردن بەراورد دەکەین بە ڕاکردن دەبینین لە یەک کاتژمێر لەمەلەکردن ٧١٥ کالۆری دەسوتێت بەراورد بە ڕاکردن لە یەک کاتژمێردا تەنها ٦٠٦ کالۆری دەسوتێت .
٤- مەلەکردن پیربوون خاودەکاتەوە ، مەلەکردنی بەردەوام دەتوانێت کاریگەرییەکانی پیربوون دوابخات بە کەم کردنەوەی پەستانی خوێن و زیادکردنی بارستەی ماسولکەکان و باشتر کردنی ئۆکسجین و رۆیشتنی خوێن بۆ مێشک و ڕێکخستنی لێدانەکانی دڵ ، هەروەها مەلەکردن دەتوانێت هێزی جەستەیی و هاوسەنگی لەکەسانی بەساڵاچوودا باشتر بکات بە نەرم کردنەوەی ماسولکەکان .
٥- مەلەکردن زۆر باشە بۆ ئەو کەسانەی بەدەست حاڵەتە درێژخایەنەکانی سییەکان وەک تەنگە نەفەسی دەنالێنن ، کە قسەکردن یان هەنێ وەرزش بۆیان سەختە ئەویش بەهۆی لەدەستدانی گەرمی و شێ لەبۆڕییەکانی هەناسەداندا دەبێتە هۆی گرژبوونی بۆڕییەکان ئەمەش کاتێک روودەدات کە هەوای دەرەوە وشک یان سارد بێت ، بۆیە مەلەکردن باشترین وەرزشە بۆ نەخۆشانی تەنگە نەفەسی .
٦- مەلەکردن متمانە بەخۆبوون زیاد دەکات ، توێژینەوەیەک کراوە لەزانکۆی گریفیت لە ئوسترالیا دەریان خستووە کە مەلەوانە گەنجەکان متمانە بەخۆبونیان زیاترە لە هاوتەمەنەکانی خۆیان کە مەلەوان نین ، هەروەها بۆ گەورە ساڵانیش دروستە ، مەلەکردن فێری متمانەت دەکات لە حەوزو ئاوی کراوەدا هەروەها لە کارەکانی رۆژانەدا .
“ شێوان ڕۆستەم “